Правото и правосудниот систем се најслабите алки во Република Македонија, како резултат на владеењето на oваа власт, велат во писмената реакција на СДСМ на прес конференцијата на ВМРО – ДПМНЕ.
Во оваа држава нема ни правда, ни независно судство, власта не почитува ни закон, ни Устав. Правото и правосудниот систем се заложници на интересите во врвот на ВМРО-ДПМНЕ.
За какви реформи во правосудството говори ВМРО-ДПМНЕ кога во Македонија не можат да се организираат и спроведат фер и демократски избори?
Македонија е земја на политички затвореници. Јавноста е сведок на селективна правда, срамни судски одлуки во исто време кога не се поведуваат постапки за скандали во врвот на власта, како „Македонка банка” „Актор” и многу други.
Затворските услови за осудениците се под секој цивилизациски минимум, нехигиенски се, недоволно безбедни и психолошки неефективни.
Оваа власт не ја интересираат самите граѓани, а најмалку нивните права кои секојдневно ги крши.