„Не е точно дека ВМРО-ДПМНЕ не го ограничува правото на штрајк. Сосема спротивно. И досега власта на ВМРО-ДПМНЕ го ограничувала правото на штрајк. Типичен пример е барањето на Тодоров за судската забрана за штрајкот на лекарите.
Сега, на ВМРО-ДПМНЕ и пречи тоа што СДСМ се спротивставува на обидите на власта за изигрување на правото на штрајк на вработените во образованието и нивните политички игри и злоупотреби.
Претставката на СДСМ до Меѓународната организација на трудот, во Женева, е за прекршувањето на одредбите на Конвенциите 87 и 98 за слободата на здружување и колективно договарање. Таа се однесува на измените во Законите за основно и за средно образование со коишто власта предвиде замена на наставниците кои штрајкуваат со други наставници, што е спротивно на Уставот и законите.
ВМРО-ДПМНЕ нема капацитет да разбере што значи почитување на правата на работниците, условите за работа и правото на штрајк.
Но, СДСМ и понатаму остро ќе се спротивставува на какви било обиди за изигрување на правото на штрајк на вработените и ќе се бори за унапредување на нивните права“, се вели во писмената реакција на СДСМ на соопштението на ВМРО-ДПМНЕ за пресот на Петар Атанасов.