СДСМ со писмено соопштение реагира на прес-конференцијата на Ирена Попова од ВМРО-ДПМНЕ.
„Денешната наводна грижа за образованието во Македонија е само уште еден доказ за лицемерноста на ВМРО-ДПМНЕ. Додека ВМРО-ДПМНЕ глуми загриженост и обвинува за кратење средства за реновирања на училишта и изградба на сали, нивните градоначалници не издаваат одобренија за градби и на тој начин го опструираат процесот. Наместо да прикажува лажна загриженост, ВМРО-ДПМНЕ да објасни зошто денес студентските домови должат над 300 милиони денари.
Заврши времето кога парите во образоаванието се трошеа за спроведување на избрзани и несоодветни проекти во образованието, кои служеа само за богатење на поединци и одеа на штета на наставниците, учениците и целиот образовен систем, како што тоа го правеше ВМРО-ДПМНЕ.
Со ребалансот на Буџетот се става крај на неодговорното и расипничко трошење на парите на граѓаните, а тоа ќе значи повеќе пари кај граѓаните и решавање на сериозни проблеми. Во образованието тоа значи и нови 35 милиони денари за студентски стандард, 10 милиони денари за ученички стипендии и школарини и вложување во квалитетно образование, наместо во криминални и несоодветни проекти како што правеше ВМРО-ДПМНЕ“ се вели во реакцијата на СДСМ.
