„Престанете да се однесувате како да сте опозиција и да ги навредувате граѓаните. Седум години сте на власт и целокупната одговорност за очајната ситуација во која се наоѓаат докторите и медицинскиот персонал е исклучително на ВМРО-ДПМНЕ и владата предводена од Никола Груевски.
– Ниту СДСМ ви е виновен што докторите три недели штрајкуваат ниту пак на било кој начин опозицијата се меша во штрајкот на лекарите и медицинскиот персонал, за чии што мотиви имаме целосно разбирање.
– Ваква деградација на медицинската професија каква што вие ја предизвикувате е незапаметена во историјата на Република Македонија.
– Наместо да барате вина таму каде што ја нема, во опозицијата, во здруженијата, во синдикатите, тргнете ги вашите партиски инсталации од здравството кое секојдневно го уништуваат.
– Тргнете ги вашите партиски платеници на директорски позиции кои вршат секојдневен притисок на вработените во здравствените институции и се изживуваат со нив, со што нанесуваат штета и на здравјето на граѓаните, само за да го задоволат вашиот партиски шеф и да ги сочуваат своите фотељи во кои дебело се налегнати“, се вели во писмена реакција на соопштението на ВМРО-ДПМНЕ кое се однесуваше на изјавата на Андреј Петров.