Телевизијата „Сител“, повторно кршејќи ги елементарните стандарди на новинарската професија, ја манипулира македонската јавност, реагира СДСМ.
„Пренесувајќи лични ставови од колумна на почитуван македонски интелектуалец, објавена пред неколку години и етикетирајќи ги како партиски, дополнително вадејќи од контекст изјави на високи претставници на СДСМ, се обидува да наметне мислење во јавноста каков е ставот на СДСМ по однос на спорот со Грција за уставното име на Република Македонија. Социјалдемократскиот сојуз на Македонија постојано и континуирано, јавно и недвосмислено го искажува својот став за овој спор. Меѓутоа, вистинското прашање е зошто тој што има обврска и одговорност да се произнесе и да изнајде решение за спорот со името, а тоа е премиерот и ВМРО-ДПМНЕ, не ги презентира своите ставови во јавноста. Молчи и се крие користејќи го квазипатриотизмот и евроскептицизмот како алиби“, се наведува во соопштението.