Назначувањето нов директор на Управата за хидрометеоролошки работи претставува уште еден срамен удар врз професионалноста и независноста на државните институции, реагира СДСМ.
„Република Македонија е веројатно единствената држава во светот чија што Управа за хидрометеоролошки работи ќе ја раководи кадар без соодветна стручна подготовка, односно политиколог по меѓународни односи и дипломатија! Дали Оливер Ромевски можеби ќе ги прогнозира меѓународните или дипломатските односи на Република Македонија?“, прашува денеска СДСМ.
Оттаму истакнуваат дека Управата за хидромеоторолошки работи е исклучително важна за многу сегменти кои се од витално значење, како земјоделството, животната средина, водостопанството.
„Што било пресудно Ромевски од ГРОМ, коалициски партнер на Никола Груевски, да биде избран на оваа позиција? Дали власта на Никола Груевски смета дека кулинарските афинитети на Ромевски се доволна дополнителна обука за директор на ваква институција?“, сметаат во СДСМ и додаваат дека Груевски, заедно со коалициските партнери, продолжува со партизацијата на државните институции и нивно полнење со несоодветни партиски кадри.
