Министерот Спиро Ристовски наместо да упатува празни апели и повици до надлежните за фер распределба на местата во студентските домови, треба да преземе конкретни мерки за спроведување на законска и транспарентна постапка, реагираат од најголемата опозициска партија СДСМ по прес конференцијата на министерот за образование, каде тој им порача на управителите во студентските домови коректно да ги распределуваат студентските легла.
Според СДСМ, изјавата во која министерот ја префрла одговорноста на управителите на домовите и на комисиите, отвора сомнеж дека и годинава студентските легла ќе се делат по партиски клуч, сметаат од таму. Од партијата бараат владата да го прекине партизирањето и на студентските домови и изборот на студентите кои имаат најголема потреба од легло во домовите да го направи со компјутерска селекција како во сите современи земји во светот.
„Ако власта е искрена во определбата за транспарентност, тоа може да го направи едноставно, користејќи современи софтверски решенија за распределување на студентските легла. Со години јавноста е сведок дека распределбата на леглата во домовите се одвива исклучиво во интерес на партиските членови и активисти на ВМРО-ДПМНЕ, но до сега, за ова, никој не е санкциониран ниту разрешен“, велат од партијата.