Присуството на делегацијата на СДСМ, предводена од лидерот Зоран Заев, на Конгресот на ПЕС и изразената силна меѓународна поддршка за опозицијата во враќањето на слободата, демократијата и европските вредности очигледно предизвикува огромна вознемиреност кај Никола Груевски.
Нервозата кај Груевски е видлива по нарачките на конструкции и невистини во провладините медиуми.
Веста објавена на Сител телевизија, за исклучување на СДСМ од Социјалистичка интернационала (СИ), наводно поради конструираниот случај Пуч, е неточна и контрадикторна конструкција на власта. Дури и самиот автор на текстот ја демантира оваа лага на крајот од текстот кадешто е наведено дека полноправното членство на СДСМ во Социјалистичката интернационала всушност престанало во 2013 година.
СДСМ во рамки на своето дејствување на меѓународен план се определи за Прогресивната алијанса (ПА). Прогресивната алијанса е нова асоцијација во која членуваат сите големи и значајни социјалистички и социјалдемократски партии, со кои СДСМ тесно соработува (СПД-Германија, британската Лабуристичка партија, француските социјалисти, Демократската партија од САД итн.). Впрочем, СДСМ има и место член во Бордот на Прогресивната алијанса.
