СДСМ обвини дека судството и обвинителството се под политичка контрола на премиерот Христијан Мицкоски и дека со одлуката во предметот „Талир 2“ Никола Груевски е спасен од одговорност, а партискиот имот на ВМРО-ДПМНЕ е вратен.
На прес-конференција, портпаролката на СДСМ, Богданка Кузеска, изјави дека „Белата палата“, чија вредност ја процени на 14 милиони евра, како и друг партиски имот вреден околу 2 милиони евра, повторно се во сопственост на ВМРО-ДПМНЕ.
Според неа, случајот покажува дека нема реформи во правосудството и дека власта го контролира судскиот систем за да ги заштити своите функционери.
Кузеска оцени дека разрешувањето и прераспределбата на обвинители и судии поврзани со предметите „Талир 1“ и „Талир 2“, меѓу кои и обвинителката Ленче Ристовска, биле дел од процесот за влијание врз постапките. Таа тврдеше дека на нивно место биле поставувани лица блиски до власта.
Од СДСМ тврдат и дека додека биле во опозиција, ВМРО-ДПМНЕ вршела притисок врз судијката што го водела предметот, а по доаѓањето на власт успеала да го промени текот на постапките.
Партијата го обвини Мицкоски и дека не презема доволно активности за екстрадиција на поранешниот премиер Никола Груевски од Унгарија, оценувајќи дека станува збор за свесна политичка заштита.