СДСМ опстојува на својот став дека нема да учествува на локалните избори нареднава година, доколку истите бидат организирани од сегашната влада, затоа што, како што велат таму, оваа институција ги изгуби сите квалификации кога станува збор за спроведување на демократски избори.
Во настаните од пред два дена, нејзината недемократска и тоталитарна политика се докажала на дело, со што се изгубила секаква надеж дека изборите би биле законски доколку оваа влада ги организира.
– Единствен начин СДСМ да учествува на избори, без разлика дали се локални или предвремени парламентарни, е преку цврсти гаранции за слободни, фер и демократски избори. По понеделничките настани, оваа влада докажа дека нема никаков кредибилитет за организирање на демократски избори, таа ја изгуби таквата квалификација. Затоа, СДСМ би учествувал на избори само доколку истите ги организира друга влада, техничка, натпартиска, експертска или широка, но со претходно изменето изборно законодавство и со вклучени програми на ОБСЕ и на ОДИХР. Слободни, фер и демократски избори можат да се организираат само со силен меѓународен мониторниг, без учество на сегашната Влада, која се покажа некомпетентна да ги спроведе – вели Емилијан Станковиќ, портпарол на СДСМ.