Партиите, коалициите и независните кандидати кои ќе учествуваат на локалните избори што треба да се одржат на 15 октомври годинава, денеска ја почнаа 20-дневната изборна кампања.
СДСМ и коалициските партнери кампањата под слоганот „Живот во Македонија“ ја стартуваат вечер со митинзи во Демир Хисар (17:30), Ресен (19:30) и Битола (20:30).
Изборниот карван на ВМРО-ДПМНЕ под слоганот „Новата ера почнува“, пак, тргнува од Охрид (19:00).
Своите кандидати за локалните избори, вчера на конвенции ги претставија ДУИ во Скопје, БЕСА во Тетово, а Алијансата за Албанците во Гостивар.
Кампањата за првиот изборен круг завршува на 13 октомври во 24 часот.
Вчера кандидатите за градоначаници потпишаа Кодекс за фер и демократски избори. Синхоронизирано на различни локации Кодексот го потпишаа и кандидатите за градоначалници во сите општини во Скопје и во целата држава.
Со овој Кодекс учесниците на локалните избори се обврзуваат и си ветуваат еден на друг, но и на сите граѓани на РМ, дека ќе се придржуваат и активно ќе го промовираат овој Кодекс, дека ќе ги почитуваат сите закони, правила и прописи на РМ, кои се релевантни за изборите и ќе го почитуваат владеењето на правото при организирањето и спроведувањето на изборите.
Шестите локални избори во Македонија се закажани за 15 октомври, а ќе се спроведуваат на 3.480 избирачки места во 80 општини и во Градот Скопје. Изборната кампања ќе почне на 25 септември на полноќ и ќе заврши на 13 октомври. Вториот круг од изборите е закажан две недели подоцна, на 29 октомври. Изборната кампања за вториот круг завршува на 27 октомври во 24 часот.