Од СДСМ преку соопштение изразуваат почит за одлуката на министерот за здравство Венко Филипче да поднесе оставка од функцијата.
„Истрагата што надлежните институции ја спроведуваат во соработка со меѓународни експерти, ќе ги даде одговорите за сите прашања поврзани со трагичниот пожар во модуларната болница во Тетово. Ефикасната и брза истрага ќе даде дополнителна потврда за капацитетноста на институциите и нивната професионална посветеност. Особено го поздравуваме ангажманот на врвните германски експерти за форензика кој треба да донесе дополнителна вредност во процесот на истрага. Истовремено, како партија изразуваме почит кон одлуката на министерот Венко Филипче за понудената оставка и ги почитуваме одлуките и на заменикот министер за здравство и директорите на болницата во Тетово“, велат од СДСМ.
Според нив, одлуката на министерот за здравство Филипче е поттикната од чувството на морална одговорност и ја отсликува неговата посветена, чесна работа како одговорен министер.
„Министерот Филипче е пример за одговорен политичар кој избра да им служи на граѓаните и да се бори за нивното здравје и нивните животи“, велат од СДСМ.
