Коалицијата „Сојуз за иднината“ денеска обвини дека се лажни ветувањата на ВМРО-ДПМНЕ за инвестиции од осум милијарди евра дадени пред четири години во пресрет на тогашните локални и претседателски избори.
Сафет Бишевац од Изборниот штаб на Сојузот на иднината на прес-конференција оцени дека по четири години од дадените ветувања, во Македонија има рекордна невработеност и опаднат стандард, а задолженоста на државата е над 1,5 милијарди евра.
„Не само што ги нема 8-те милијарди, туку Груевски ја задолжи државата преку 1,5 милијарда евра. Единствената видлива инвестиција е финансиското злосторство кое е тешко речиси половина милијарда евра, фрлени на камен, бронза, златни ангели, огради и жални врби во „Скопје 2014“.
– Поплавите се најдобра потврда за неодговорното однесување на власта. Приказните и скапите реклами за реформите, инвестициите и економскиот развој станаа предмет за исмејување и централна тема за хумористични скечеви и комедии“, рече пратеникот Сафет Бичевац.
Обвини дека околу половина милијарда евра се потрошени за проектот „Скопје 2014“, а потврда за неодговорното однесување на власта се поплавите што ја зафатија државата.
„Токму затоа на овие локални избори, гласовите на граѓаните имаат двојна вредност. Покрај изборот за градоначалници и советници, со својот глас граѓаните имаат можност да ги казнат лагите и манипулациите на оваа власт, да го делегитимираат режимот и да пружат отпор на насилието и диктатурата која се спроведува“, истакна Бишевац.