Потребно е итно укинување на радиодифузната такса за граѓаните побрзо да бидат ослободени од трошоци и притисок, како и да се обезбеди одржливо финансирање на МРТВ од буџетот, порачува СДСМ.
„Неправедно е граѓаните да плаќаат даноци за да го полнат буџетот и дополнително да плаќаат rадиодифузна такса за финансирање на партиско гласило во што е претворена МРТВ. УЈП секоја година блокира десетици илјади граѓани и фирми поради радиодифузна такса. Тоа кај граѓаните и кај фирмите создава дополнителни проблеми, малтретирања, хаос со наплатата и нови трошоци. Барањето за укинување на радиодифузната такса е мерка од програмата на СДСМ што е интерес на сите граѓани во Македонија.“, се вели во соопштението од најголемата опозициска партија.
Реформите во медиумите, како што се наведува, се една од клучните точки во договорот од Пржино и еден од главните услови за слободни, фер и демократски избори.Неспроведените реформи за слободни медиуми, покрај прочистувањето на избирачкиот список, беше клучна причина за одложување на изборите на 24-ти април, потсетува СДСМ и додава дека во Македонија мора да има и ќе има слободни, фер и демократски избори со прочистен избирачки список и реформи во медиумите.