„Вчера бевме лажно обвинети дека, спротивставувајќи се на најновото задолжување, наводно ги загрозуваме интересите на граѓаните и наводно се конфоронтираме со Светска банка.
– Јас овде јавно сакам да кажам дека тоа е апсолутна невистина. Напротив, во оваа ситуација, изгледа дека СДСМ е единствениот кој суштински се грижи за интересите на граѓаните и на државата.
– Прво, да ги расчистиме дилемите околу комуникацијата со Светска банка. Нашето писмо е испратено ПОСЛЕ соопштението до медиумите од локалната канцеларија на Светската банка, што значи дека тоа нивно соопштение никако не може да биде одговор на нашето писмо. Но дури и да беше така, ние сме целосно убедени во исправноста на нашите ставови и подготвени сме во секое време да разговараме на овие теми со секој оној кој и мисли добро на државата и на граѓаните.
– Второ што сакам да појаснам е причината зошто ние реагираме вака. Треба на сите да ни биде јасно: Македонија забрзано се движи кон економска ситуација која по многу параметри непријатно наликува на грчкото сценарио. Ако не направиме нешто веднаш да запре сегашното неодговорно однесување на власта, таквото сценарио ќе стане неизбежно.
– Ако и ова најново задолжување помине, власта комотно ќе може и овие пари да ги потроши за нови реклами, споменици или избори. Видовме како завршија 220-те милиони евра од ММФ, позајмени два месеца пред избори. СДСМ не сака и не смее да го дозволи тоа, пред се имајќи ги предвид интересите на граѓаните и добробитта на нашата држава. Затоа, велиме стоп.
– Нема повеќе непродуктивни задолжувања. Ќе ги искористиме сите механизми кои ни стојат на располагање и ќе направиме се за да запре оваа погубна политика, и да се спречи грчкото сценарио во Македонија.
– Целосно сме убедени дека ова е единствениот начин да се спречи влошувањето на економската состојба во државата и дека тоа е во најдобар интерес на граѓаните и на државата, и затоа настапуваме со чиста совест. Да имаше партија во Грција која пред 6, 7 или 10 години на ваков начин ќе предупредеше и ќе вклучеше аларм за неодговорното задолжување и трошење на државата, можеби Грција денес немаше да дојде до ова дереџе.
– Нема кој друг да биде позагрижен за нашата иднина од нас самите. Ние мора да научиме еднаш засекогаш да се грижиме сами за себе и дека никој нема однадвор да дојде и да ни ги реши проблемите. Да не заборавиме, на крајот, ние ќе ги враќаме долговите“, изјави Зоран Јовановски.