СДСМ денеска на прес-конференција оцени дека пресудата со која Љубе Бошкоски е осуден на 12 години затвор е „потврда дека не постои правна држава и независно судство“.
„Денешната пресуда против Љубе Бошкоски е уште една срамна пресуда на македонските судови. Ова е уште еден доказ дека во Македонија не постои ниту правна држава ниту независно судство, ниту дека така наречените реформи им гарантираат на граѓаните владеење на правото и заштита на нивните права.
– Кога Хашкиот трибунал го ослободи, го пречекаа на аеродром како херој, за сега, на македонскиот политички трибунал да му наложат ваква пресуда“, изјави Петре Шилегов, портпарол на СДСМ.
Според портпаролот на партијата Петре Шилегов, пресудата на Бошкоски е пресметка на власта со политичките неистомисленици и противници.
„Со ова, само се потврдува дека продолжува хајката и одмаздата на власта против политичките неистомисленици и нејзините политички противници.
– Откако Македонија ја направија единствена држава каде има политички затвореници и каде владее автократски режим, мораше дополнително да го казнат, само заради тоа што ја допре најболната точка на ВМРО-ДПМНЕ, вмешаноста на фамилијата во сомнителни бизниси“, рече Шилегов.
Тој го повика Апелацискиот суд во Скопје, при одлучувањето по жалбите, да се води по законските прописи, а не по, како што наведе, политичките диктати.
„СДСМ го повикува Апелациониот суд во Скопје, при одлучувањето по жалбите, да се води по законските прописи на Република Македонија, а не по политичките диктати на центрите на моќ“, додаде портпаролот на СДСМ.