Пратеничката група на СДСМ достави реакција до Советот за радиодифузија за новиот телевизиски спот кој, како што се наведува во партиското соопштение, е дел од кампањата на Владата на Република Македонија против абортусот и бара негово повлекување.
– Новиот спот во којшто абортусот како медицинска интервенција се изедначува со убиство испраќа порака на осуда и стигматизација кон сите жени и парови кои го искористиле или планираат да го искористат своето природно репродуктивно право. Воедно, овој спот е и брутална навреда и квалификација на лекарите како убијци, се вели во писмената реакција од СДСМ.
Од партијата истакнуваат дека со членот 41 од Уставот на Република Македонија се гарантира правото на човекот слободно да одлучува за создавање на деца.
– Ние пратениците и пратеничките потпишани на оваа изјава застануваме во одбрана на слободите и човекови права на секоја жена и затоа бараме итно повлекување на овој противуставен спот, стои во реакцијата на пратеничката група на СДСМ.