СДСМ со писмено соопштение реагира на деншната прес-конференција на Горан Чогеља од ВМРО-ДПМНЕ.
„Наместо да шири лажни вести Горан Чогеља прво треба да се запознае со елементарните работи во енергетиката. Потоа да им се извини на граѓаните за предзвиканите штети, бидејќи во времето кога токму тој и Христијан Мицкоски го советуваа Никола Груевски, беше укината евтината тарифа на електричната енергија, а Македонија доби две тужби поради неспроведување на енергетски реформи.
АД ЕЛЕМ јавно соопшти дека може да произведува електрична енергија преку хидроелектраните онолку колку што е нивната моќност. Електраните Глобочица и Шпилје два и пол месеци работат со максимален капацитет и се произведува електрична енергија според максималната инсталирана моќност на тие капацитети.
По енергетскиот пустош што го остави, ВМРО-ДПМНЕ нема никаков кредибилитет да зборува за енергетика. Особено што нивниот претседател Мицкоски петти ден се крие од јавноста и не дава одговори на прашањата поврзани со договорите вредни10.5 милиони евра, склучени во период кога токму тој раководел со ЕЛЕМ.
Владата предводена од СДСМ како и сите надлежни институции и претпријатија работат одговорно, транспарентно во градењето на ефикасен, модерен и стабилен енергетски сектор.
Извештајот за одржлив развој на Енергетска заедница посветен на земјите од Западен Балкан, кој Македонија ја рангира на прво место во регионот во однос на напредокот во исполнување на енергетските реформи е доказ за исправноста на досегашната работа“ се вели во реакцијата на СДСМ.