Општините започнаа со подготовки за дочек на Нова Година. Неколку од нив веќе објавија тендери за украсување на улиците и организирање огномет.
Според јавно достапните информации на Бирото за јавни набавки огласи за новогодишно ускрасување и декорирање на улици објавиле повеќе општини.
Меѓу оние кои доставиле јавен оглас се Карпош, Кисела Вода, Валандово, Струмица, Велес и општина Ѓорче Петров.
Најгалантна меѓу општините кои објавиле оглас за новогодишно украсување е Карпош. Оваа скопска општина проценила дека за изработка и реализација на украсување и декорирање на дел од улиците на нејзина територија и организирање на огномет се потребни 7.627.118 милиони денари или околу 120.000 евра без вклучен ДДВ.
Скопската општина Кисела Вода проценила дека за новогодишно украсување и се доволни 1.694.915 денари или околу 27.000 евра што е за четири пати помалку во однос на општина Карпош.
Со четири пати помала сума за украсување или идентична како на Кисела Вода е онаа на општина Струмица.
Општинската администрација проценила дека за оваа услуга без вклучен ДДВ се доволни 1.694.915 денари или околу 27.000 евра.
Скопската општина Ѓорче Петров пак за празнично и новогодишно украсување планира да потроши 1.700.000 денари или околу 27.500 евра без вклучен ДДВ.
Најскромна околу тоа колку пари ќе потроши за украсување и огномет е општина Валандово. Тие проценели дека за оваа услуга се доволни 800.000 денари или околу 13.000 евра без вклучен ДДВ што во однос на Карпош е за речиси девет пати помалку.
Општина Велес засега има објавено оглас за поставување и демонтирање на новогодишна елка и украсни елементи. Проценката на оваа услуга е 300.000 денари или околу 5.000 евра без вклучен ДДВ.
Општина Карпош околу парите кои планира да ги потроши за Нова Година приближно му парира на Град Скопје, кој за оваа намена од касата планира да одвои околу 150.000 евра.