Наученото во четиригодишното школување, учениците да го презентираат во пракса, е целта на 8. Саем за бизнис и претприемништво што се одржува денеска во Општинското средно економско училиште „Јовче Тесличков“ во Велес.
Саемот го организираа наставниците и учениците.
На штандови, поделени во седум компании од различни области, туристички агенции, хотели, козметика, здрава храна и трговија, кои сами ги основаа, учениците на посетителите им делеа пропаганден материјал, им појаснуваа што нудат. Со заинтересираните склучуваа и договори за соработка, исто како што би правеле во реалниот бизнис.
– Во тренинг фирмите кои ги основаа учениците со подршка на наставниците по стручните економски предмети, многу е важно да добијат искуства од тимска работа, да ги научат особините кои се многу важни за работа: флексибилност, ефективност,…, и сами да донесуваат одлуки како кога по завршувањето на школувањето ќе работат во вистински компании. Тогаш и ова искуство од саемот ќе им биде многу драгоцено, изјави директорката на училиштето Нада Јованова.
Од Општина Велес која секоја година ја поддржува манифестацијата, велат дека Саемот е многу важен за создавање школувани и обучени високи стручни економски – бизнис кадри кои вистински ќе ја знаат работата на претприемништвото што е клучен фактор за економски развој на општината.
Гости на Саемот се ученици од Словенија и Финска.