Шефицата на одделот за организиран криминал при јавното обвинителство, Вилма Рускоска, во однос на вчерашниот инцидент кој се случи во Кривичниот суд, каде по барање на нејзината колешка, обвинителката Ивана Трајчева беа избришани материјали од камерите на снимателите, рече дека станува збор за едно големо недоразбирање и дека судот и обвинителството ќе имаат дополнително соопштение за случајот.
– Се слушнав со претседателот на судот, го испитува настанот. Разговарав и со колешката. Станува збор за едно големо недоразбирање. Дополнително ќе има соопштение, рече Рускоска.
По вчерашниот скандал кој наиде на бурни реакции од јавноста кога по барање на една од обвинителките судската полиција бришеше материјали од снимателите на кои е снимена истата, денеска обвинителките седеа мирно и не ургираа до полицијата додека снимателите земаа инсерти од судницата.
Од Кривичниот суд велат дека немаат никаква врска со вчерашниот настан и дека полицискиот службеник ќе даде изјава за преземените дејствија.
Во одобренијата што медиумските екипи претходно ги обезбедуваат од Врховниот суд, никаде не е ограничено снимањето на странките во постапката. Обвинителите исто како и обвинетите се странки во постапката пред судот.
Виктор Јованов