Доколку претседателот на државата Ѓорге Иванов одлучи да не го потпише и по вторпат законот за ратификација на Договорот за спорот со името, тој свесно го крши Уставот и ќе го наруши правниот и политичкиот систем во државата, и сериозно се меша во надлежностите на Законодавниот дом, за кој нема право, истакна денеска потпретседателката на Собранието и пратеник од СДСМ Фросина Ташевска Ременски.
Иванов е должен да го питпише Указот по повторното гласање на Законот согласно член 75 од Уставот.
– Поради сето ова, ваквото однесување на претседателот може да биде предмет на правни лекови во Собранието, тука мислам на импичментот, но и Уставниот суд и други надлежни институции имаат право, но и обврска да поведат постапки, рече Ременски.
Што се однесува до прекршувањето на членот 308 од Кривичниот законик, Ременски вели дека прашањето може да го постави и „дали претседателот, ставајќи се во интерес на други центри на моќ, не станува кочничар на евроатлантската иднина на земјата и нели може овој член да се однесува и на Претседателот на Републиката“.
Претседателот Ѓорге Иванов денеска и официјално соопшти дека нема да го потпише Указот за прогласување на Договорот за спорот со името со Грција, а причините ги достави до Собранието.