Ременски бара изземање на Русковска од судењето за „Меѓународен сојуз“: Таа е селективна и ќе ја попречува правдата

Од:

Поранешната пратеничка од СДСМ, Фросина Ременски, третообвинета во случајот „Меѓународен сојуз“, заедно со Бојан Јовановски- Боки 13, бара да се изземе обвинителката Вилма Русковска од случајот, бидејќи, како што рече, постојат цврсти докази дека „во сите фази на предистрагата и истрагата има селективност во постапувањето преку кршењето на правата на одбраната, но и во делот на попречување на правдата“.

Како една од причините за изземање, Ременски наведе дека Русковска вршела незаконски претрес во нејзиниот дом.

„За ова постојат повеќе од 16 докази приложени во барањето за изземање до државниот јавен обвинител, за што е прифатена и тужба до Судот за човекови права во Стразбур. Очекувам државниот јавен обвинител да ги разгледа совесно и професионално да одлучи за нејзино изземање како застапник на обвинението, во контекст на мене и на сите во случајот, затоа што се сомневаме дека сериозно е загрозена независноста и објективноста на постапката“, рече Ременски.

Инаку, таа како почесен претседател на „Меѓународниот сојуз“ е обвинета заедно со Бојан Јовановски како претседател, Јасна Ерцеговиќ-Мандиќ како потпретседател, таткото на Јовановски, Миле Јовановски, и неговата асистентка Христина Блажеска. Како правно лице обвинета е и невладината организација „Меѓународен сојуз“.

Јовановски е обвинет за измама и перење пари. Ременски е обвинета за помагање во делото измама, Мандиќ за помагање во измамата и перењето пари, Миле Јовановски се товари за помагање во перењето пари и за неовластено изработување, држење, посредување и тргување со оружје. При претрес во неговиот дом биле пронајдени три полуавтоматски пиштоли и муниција за кои немал дозвола.

Според обвинителството, обвинетите ги измамиле бизнисмените Силјан Мицески и Ардијан Амзоски дека ќе учествуваат во проект за изградба на старечки домови преку „Меѓународен сојуз“ на Бојан Јовановски-Боки 13 и ги оштетиле со повеќе од милион евра.

Судењето почнува денеска, а Ременски тврди дека нејзиното име во обвинението се спомнувало само двапати, и тоа единствено затоа што сакала да даде поддршка на еден добар проект кој требало да го реализираат трети лица.

„Тоа е сериозен преседан кој можеби сега не може да се види, но во блиска иднина може да предизвика сериозни турбуленции и во рамките на обвинителското постапување за секој носител на јавна функција кој што во некаква ситуација ќе поддржи нешто што можеби нема да биде реализирано од трети лица кои си презеле обврски да го реализираат“, рече Ременски.

Судии во овој случај се Софче Гаврилова-Ефремова и Васка Николовска-Масевска, истите судијки кои го судеа случајот „Рекет“, каде Бојан Јовановски беше осуден на девет години затвор, а ексшефицата на СЈО Катица Јанева доби казна од седум години затвор.

Би можело да ве интересира

Рочиште за „Меѓународен сојуз“, презентирани пораки на Јовановски со Заев

Ана Ололовска

Катастарски парцели презентирани на рочиштето за „Меѓународен Сојуз”

Ана Ололовска

Ременски бара да се прикаже снимка од домашниот видео-надзор: Обвинение не може да опстои со незаконско постапување

Кристијан Ландов

Пораките помеѓу Јовановски и Ременски читани во судница: Боки да ми ги врати парите и нема да има проблем

Кристијан Ландов

(ВИДЕО) Немојте да се дерете не сме мали деца: Бојан Јовановски опоменат, судијката останува

Кристијан Ландов

Продолжува судењето за „Меѓународен сојуз“

Ана Ололовска