Ќе се реконструираат четири здравствени домови во Пехчево, Валандово, Штип и во Ресен, со што би требало да се подобрат условите за лекување на болните, но и инфраструктурните услови за работа на лекарите и останатиот медицински кадар.
Договорено е и директорите на здравствените домови со сопствени средства да учествуваат во целата инвестиција за реконструкција на овие ЈЗУ.
Вкупната вредност на реконструктивните зафати на здравствените домови изнесува 20 милиони денари.
„Реконструкцијата на здравствени домови е една од покрупните реформи на кои ќе бидеме фокусирани во следните неколку месеци, што во голема мера ќе влијае на подобрување на условите за лекување на болните, а секако и за подобрување на инфраструктурните услови за работа на лекарите и останатиот медицински кадар”, рече министерот Никола Тодоров.