Поројниот дожд проследен со град со големина на зрно грав, што го зафати синоќа Струмичко предизвика поплави во долниот дел од Струмица.
Се излеаја водите од кориото на поројот Крушевска Република и ги поплавија подрумите и дворовите на станарите на улиците Браќа Минкови и Максим Горки.
– Од утрово нашите екипи на водовод и канализација се во овој дел од градот и ги преземаат сите мерки за нормализација. За жал, недовршеноста на одводниот канал и преобилните поројни врнежи и овојпат беа преголеми за инсталираната атмосферска канализација. Правиме се да ја санираме состојбата на теренот и да го вратиме животот во нормала во овој дел од градот, изјави Зоран Горгиев, директор на ЈПКД Комуналец-Струмица.
Поројните дождови и топењето на снегот од околните планини го преполни коритото на реката Струмица, која утринава го проби насипот во долниот дел од селото Босилово и се разлеа по нивите во правецот на селото Турново.