Реката Црна се излеа во атарите на три села од општина Могила, информираат од Дирекцијата за заштита и спасување со седиште во Битола.
Според Димче Јошевски, ситуацијата е најкритична кај селата Вашарејца, Новоселани и Ношпал каде има целосна мобилизација на надлежните служби и локалното население.
– Претпладнево забрзано се зголеми нивото на реката Црна и достигна до 4,70 метри и за жал, нема знаци за намалување. Тоа придонесе дополнително да се мобилизираме за да водата не навлезе во куќите. Иако имаме механизација, таа неможе да се доближи до коритото и затоа поставуваме вреќи и дополнителна заштита за што голема помош имаме од локалното население, истакна Јошевски.
Од регионалното одделение на Дирекцијата за заштита и спасување потврдија дека нема поголеми проблеми во општина Новаци и ситуацијата е под контрола, и затоа максималната концентрација на надлежните е насочена во општина Могила.
