Кастриот Реџепи не одговори дали би бил дел од парламентарното мнозинство во Собранието или пак би делувал опозициски, бидејќи според него, тој е уште член на БЕСА иако партијата соопшти дека е исклучен. Иако неколку пати во текот на прес-конференцијата кажа дека има јасни сигнали дека Македонија во декември ќе добие датум за преговори, сепак, рече: „Никој не може да гарантира дека ќе има или ќе нема преговори со ЕУ“.
„Додека не добијам официјална одлука дека сум исклучен, јас сум координатор, пратеник и член на БЕСА. Ниту од собраниските служби немам добиено известување дека не сум дел на БЕСА. Партијата се сеуште дел од мнозинството. Склучување на коалиции врши Централниот одбор, кога тој ќе реши дека не е дел од мнозинството тогаш како член ќе размислам да ја почитувам таа одлука“, кажа Кастриот Реџепи.
Тој не одговори кој му се јавил и со кого контактирал пред да ја донесе одлуката да не гласа за недоверба на Владата. За контактите со премиерот Зоран Заев, кажа дека му се обратил за да му каже да не поднесува оставка. Не одговори конкретно дали преку контакт влијаел на неговата одлука да не гласа за недоверба.
„Доколку Заев останеше при неговата оставка, јас немаше да размислувам дека не треба да падне Владата. Зошто не можеме да се стрпиме до 14 декември? Јас сум пратеник на БЕСА. Се додека не се промени мојот статус, ќе делувам така. За мнозинството и бројките на мнозинство одговорен е премиерот. Во комуникација со премиерот Заев сум бил претходно, а и понатаму како висок функционер на партија која е дел до мнозинството. И во моментот кога поднесе оставка, апелирав да не го прави тоа, бидејќи не е моментот. Сите дејствија може да се направат откако ќе го добиеме датумот за преговори со ЕУ“, додаде Реџепи.