СДСМ не си верува ниту сам на себе кога зборува за инвестициите во железницата. Во Македонија постојат споменици на инвестициите на СДСМ во железницата – тоа се бетонските столбови на кои требаше да биде направена пругата кон Бугарија.
Ова се наведува во реакцијата од ВМРО – ДПМНЕ на изјавата на Благој Бочварски, претседател на Комисијата за транспорт и врски на СДСМ.
– СДСМ во железницата успешно избрка од работа стотици вработени и успешно не закова ниту една шајка на некоја пруга. Набавката на нови возови во време на СДСМ е од жанрот научна фантастика. Затоа СДСМ има елементарни непознавања од оваа тема и е во паника кога во Македонија се обновува возниот парк на железницата и се инвестираат милиони евра во реконструкцијата на железничките станици и пруги, се наведува во реакцијата.
ВМРО – ДПМНЕ во реакцијата посочува дека првиот од новите возови е по европски стандарди, како и пругата и ќе започне редовно да сообраќа многу скоро кога ќе се завршат сите редовни процедури, како што е веќе завршеното успешно тестирање од страна на европско нотифицирано тело.
Покрај обновувањето на возниот парк, се потсетува во реакцијата од ВМРО – ДПМНЕ, дел од инвестициите во железницата во овој циклус се: реконструирана железничката делница Табановце-Куманово во должина од 12 километри и Миравци-Смоквица исто така во должина од 12 километри, во инвестиција вредна 7 милиони евра, во тек е реконструкција на делницата Ногаевци-Неготино од 30 километри и вредност од 9,4 милиони евра, а во тек е изградба на пругата кон Бугарија, конкретно делницата Куманово-Бељаковце во должина од 31 километар и вредност од 39 милиони евра. Во завршна фаза е проектирањето на втората делница кон Бугарија од Бељаковце до Крива Паланка за која се обезбедени средства од 147 милиони евра. Се подвлекува дека во тек е изградбата на пруга од Битола до Кременица кон Грција и еден крак до Индустриската зона Жабени, инвестиција од 19 милиони евра, како и проектирање нова пруга кон Албанија од Кичево до Лин во должина од 63 километри.
Завршена е реконструкцијата на Железничката станица во Скопје во вредност од 2,6 милиони евра и во тек е реконструкција на 10 железнички станици на Коридорот 10, инвестиција од 1,9 милиони евра кои ќе се завршат во 2016 година.
– За само 84 дена на 24-ти април СДСМ ќе мора да излезе повторно на мегдан со судот на народот. Ќе мора да ги погледне во очи граѓаните кои ги нарекува стока и стадо овци, граѓаните кои сака да ги лаже со бесрамните продукти на Заев, Спасовски и Чаушот и 10-ти пат по ред да се покори пред волјата на народот, стои во реакцијата од ВМРО – ДПМНЕ.