Пратеникот на ВМРО-ДПМНЕ, Бране Петрушевски, обвини дека СДСМ и лидерот на партијата Венко Филипче применуваат „двојни аршини“ во однос на проектот „Безбеден град“.
Според Петрушевски, од една страна СДСМ јавно се залага за санкционирање на лицата кои управуваат возила без возачка дозвола, а од друга страна во Собранието гласале против имплементацијата на системот „Безбеден град“.
Тој тврдеше дека за време на протестите активисти поврзани со СДСМ упатувале закани кон полициски службеници и „дивееле низ градовите за да возат без возачки дозволи“, додавајќи дека ваквиот начин на протест ВМРО-ДПМНЕ не го поддржува и јавно го осудува.
Петрушевски потсети дека СДСМ и Филипче гласале против проектот во Собранието и го посочи координаторот на пратеничката група на СДСМ и поранешен министер за внатрешни работи, Оливер Спасовски, оценувајќи дека во неговиот мандат не бил реализиран системски проект за дигитална контрола на сообраќајот.
„Сега кога конечно се воведува систем кој воспоставува ред, одговорност и еднаквост пред законот, Филипче и СДС се против“, изјави Петрушевски, додавајќи дека проектот „Безбеден град“ не е партиска агенда, туку системско решение за зголемување на безбедноста на граѓаните.
Тој оцени дека секој што се залага за почитување на законот и безбедноста во сообраќајот треба да го поддржи проектот, а спротивното, според него, претставува политичка калкулација на штета на јавниот интерес.