Во врска со информациите изнесени на денешната прес-конференција на Асоцијацијата за дијабет „Баланс Мк“ уште еднаш потсетуваме на ставовите на докажани експертите и стручни здруженија од областа на ендокринологијата, како што се Универзитетската клиника за ендокринологија, Научно-стручното здружение на ендокринолози и дијабетолози на РМ, д-р Викторија Перцан, раководител на Центарот за дијабетес и други, кои цврсто застанаа зад ставот дека – Апсолутно нема никакви причини за страв и паника кај лицата со дијабетес и дека во нашата држава се присутни хумани инсулини и инсулински аналози со исклучително висок квалитет од врвните светски производители од Соединетите Американски Држави, Данска и Франција.
Значи, секоја замена со друг тип на инсулин се прави со соодветен инсулин на начин што нема да доведе до нарушување на гликемиската контрола, што значи дека не постои никаков медицински ризик за пациентите и никакви штетни последици по нивното здравјето.
По тој повод го повикуваме Зружението БалансМК јавно да ги каже имињата на нивните таканаречени експерти, дали и со колкаво искуство тие располагаат во областа на ендокринологијата и од кои причини, без никаква медицинска и научна основа шират непотребен страв и паника кај пациентите.
Всушност, идејата на ваквите прес конференции е да се чека јавноста да ги заборави цврстите ставови на експертите и нивното тврдење дека нема никаква штетност по здравјето, и повторно да се изнесуваат невистини и да се манипулира јавноста. Исто така, сакаме да потенцираме дека е безобразна лага и дрско лажење дека имаме каков било бизнис интерес. Напротив, со ова се бориме против бизнис интересите на една компанија која сака да ја искористи доминантноста на пазарот со цел целосна контрола на пазарот и притисок врз државата.