Министерот за здравство Никола Тодоров денеска имаше средба со новоименуваниот амбасадор на Кина во Македонија, Вен Џеншун.
На средбата, како што соопшти Министерството за здравство, се разговарало за предвиденото отворање на Центар за традиционална кинеска медицина во Република Македонија, со што ќе се овозможи размена на искуства меѓу македонските и кинеските лекари, едукација на кадри во областа на традиционалната кинеска медицина, како и соработка на Бирото за лекови со соодветната институција од фармацевтската дејност во Народна Република Кина.
Тодоров и Џеншун разговарале за можноста за организирање посета на македонски лекари во повеќе кинески болници, со цел одблиску да се запознаат со процесот на лекување во здравствени установи во кои има голема фреквенција на пациенти на дневна основа.
Како што се наведува во соопштението, Центарот за традиционална кинеска медицина кој се планира да се отвори во Штип, е резултат на добрата соработка меѓу Македонија и Кина.