Националниот акционен план за борба против опустинување (НАП) ќе даде детален опис на состојбата со деградација на земјиштето и опустинувањето во државата, истакна заменик министерот за животна средина и просторно планирање Стево Темелковски на работилницата за презентирање на наодите од предлог верзијата на НАП, што вчера и денеска се одржува во Кавадарци.
Темелковски подвлече дека акцискиот план ќе овозможи да се постават приоритети и акциска програма на мерки за справување со деградација на земјиштето, да се направи економска анализа, да се идентификуваат и инволвираат засегнатите страни и да се вклучи јавноста во справувањето со опустинувањето и ефектите од суша. Тоа, додаде, ќе овозможи и идентификација на меѓународните обврски на државата од областа опустинување, деградација на земјиштето и ублажување на ефектите од суша.
Опустинувањето и деградацијата на земјиштето, заедно со климатските промени и загубата на биолошката разновидност, според Темелковски, се најголеми предизвици со кои се соочува одржливиот развој.
На работилницата ќе се прецизираат и идентификуваните мерки, активности и приоритети за справување со деградација на земјиштето, како и активно вклучување на јавноста и засегнатите страни во процесот на изработка на документот.
Работилницата се организира во рамки на проектот „Поддршка на Република Македонија за изработка на Национален акционен план (НАП) усогласен со 10-годишната стратегија на Конвенцијата на ОН за борба против опустинување (УНЦЦД) и процесот на известување согласно УНЦЦД“.