Во рамки на одбележувањето 70 години од постоењето на Градската библиотека „Браќа Миладиновци“- Скопје, денеска во употреба пуштена е реновираната библиотека „Стале Попов“.
В.д. директорката на Градската библиотека „Браќа Миладиновци“ Гордана Петревска истакна дека библиотеката е реновирана со средства од Град Скопје. Информира дека библиотеката не работела шест месеци заради реконструкцијата. Во просек, како што рече, годишно се издават шест илјади книги и има од 460 до 500 читатели.
– Оваа библиотека е отворена првпат во 1961 година. Се почнало со книжен фонд од 3.000 книги и 300 читатели. Во 1963 година библиотеката настрадала во земјотресот. Вработените од „Страшо Пинџур“, чиј клон е библиотекава, ги собрале книгите и под еден голем шатор ги ставиле пред зградата и така библиотеката работела до доцна во зимата, потсети Петревска.
Таа потсети дека библиотеката „Страшо Пинџур“ од отворањето до 1971-72 била детска, наменета за ученици, со лектирни изданија и со други соодветни наслови кои биле прилагодени за возраста.
– Во 1972 година веројатно за да се зголеми бројот на читателите, почнал да се набавува фонд и за возрасни и почнале да се зачленуваат возрасни читатели, рече Петреска.
Утре е предвидено пуштање во употреба на реновираната бибиотека „Карпош“, а утревечер со почеток во 19 часот ќе има „Вечер на читателите“. В среда на пладне ќе има средба со пензионерите.
Свеченото одбележување на јубилејот ќе биде в четврток, 12 ноември во библиотеката, каде е предвидено да се обрати в.д. директорката Гордана Петревска и градоначалникот на Град Скопје Коце Трајановски. Проф. д-р Виолета Мартиновска ќе ја промовира монографијата „70 години Градска библиотека Браќа Миладиновци-Скопје“. Ќе бидат доделени пофалници на истакнати работници и плакети на Град Скопје и на Министерството за култура.
Бибилотеката „Браќа Миладиновци“ почнала со работа на 15 ноември 1945 година. Организациски во моментов располага со една матична куќа, три централни „Цветан Димов“, „Страшо Пинџур“ и „Другарче“ и 14 клона. Има и подвижна билиотека која ги опслужува училиштата, пред се во руралните средини каде нема библиотеки.