Граѓаните кои живеат на Улица 29 во Сопиште велат дека повеќе од седум години имаат проблеми со електричната енергија, а нивните апели до ЕВН Македонија паѓаат на глуво уво. Од денес граѓаните протестираат и медиумски апелираат овие проблеми да си најдат соодветно решение, и 50те домаќинства кај кои се случуваат проблемите да имаат пристап до достоинствен живот.
„Повеќе од седум години над 50 домаќинства кои живеат на улица 29 имаат проблеми со електричната енергија, и апелираат до ЕВН Македонија кои не интервенираат и не ги решаваат проблемите. Од достапни 220 волти во три фази, се случува скоро секој ден да се достапни под 200 волти, а преку викенди не работат барем две фази или воопшто нема електрична енергија. За ова се направени безброј дописи до ЕВН Македонија, кои сеуште го немаат решено овој проблем, а ние празниците ги чекаме со свеќи наместо струјата која редовно ја плаќаме.“ – истакнуваат жителите кои денес протестираа.
Денес тие ја блокираа главната улица „Христо Татарчев“ и во Сопиште со свеќи упатија уште еден апел до ЕВН Македонија да ги реши проблемите со електричната енергија. Дополнително, тие се обратија и до Општина Сопиште да ги поддржи во решавање на овој проблем, и да престане да издава градежни дозволи додека има проблеми со инфраструктурата на улица 29.
