Штипјанец кој превезувал мигранти се обидел да и избега на полицијата, која пак, го стопирала за да му изврши контрола. Од МВР велат дека по кратко време, полициски патроли успеале да го застанат возилото, а возачот кој се обидел да избега трчајќи, го уапсиле.
„На регионалниот пат Свети Николе – Куманово, полициски службеници дале знак за запирање на товарно возило „мерцедес“, со велешки регистарски ознаки, но возилото не застанало. По кусо време возилото сопрело и возачот почнал да бега, но веднаш бил фатен од полициските службеници. Станува збор за М.Ј.(28) од Штип, кој бил лишен од слобода и приведен во полициска станица, затоа што при преглед во возилото биле пронајдени 43 мигранти, меѓу кои имало и деца, и тоа од Сирија, Пакистан и Авганистан“, велат од МВР.
За настанот бил известен Јавен обвинител, по чија наредба мигрантите се сместени во Транзитниот центар „Винојуг“ Гевгелија, а против М.Ј ќе биде поднесена соодветна пријава.