Студенти од Факултетот за електротехника и информациски технологии при Универзитетот „Св. Кирил и Методиј“ во Скопје, денеска, го промовираа првиот електричен картинг во Македонија, наречен „Феитмобил“.
Електричниот картинг се реализира во рамки на проектот „Проектирање и реализација на електрично возило“ на тимот ЕЛ-КА, започнат во октомври минатата година, финансиски поддржан од Факултетот за електротехника и информациски технологии и од Универзитетот „Св. Кирил и Методиј“.
„Навистина сме горди на тимот студенти кои успеаја за неполни десет месеци да го креираат ова картинг возило. Овие 15 студенти од студиската програма Електроенергетика, автоматизација и обновливи извори на енергија, секојдневно, работеа на неговата реализација, под менторство на професор д-р Гога Цветковски и професор д-р Снежана Чундева, како и други професори од ФЕИТ. Целта на проектот е да се изработи електричен картинг кој ќе биде погонуван од електричен мотор напојуван од акумулаторски батерии. Ние како факултет секогаш сме подготвени, на секој можен начин, да ги поддржиме студентските иницијативи и да дадеме придонес во развојот на технологијата во Македонија“, рече професор д-р Христина Спасевска, продекан за настава на ФЕИТ.
Проектот ќе се реализира во неколку фази во времетраење од 3 години. Во првата фаза, која веќе е завршена, всушност се создаде конструктивниот изглед на картингот, неговото механичко и електрично поврзување и на крај, задвижувањето.
„Понатаму се планира модернизирање од аспект на режимите на сопирање со можност за враќање на енергијата и полнење на батериите, промена на насоката на движење и слично. Благодарност до ФЕИТ и до УКИМ, како и до неколку македонски компании ТАБ МАК, Атлантик, Деко, Агроопрема и други кои дадоа поддршка во реализација на проектот“, рече Иван Спасески, претставник на тимот студенти кои го реализираа електричното возило.
Возилото Феитмобил е напојувано со батерии, погонот е еднонасочен (DC) мотор со номинална моќност 2,5kW и има автономија на движење околу 30 минути. Тимот кој учествуваше во реализацијата на првата фаза од проектот го сочинуваат студентите: Александара Аризанковска, Амир Беадини, Петранка Бончева, Бодан Велковски, Ристо Ефремов, Јанѓеловска Елизабета, Стефан Лутовски, Александар Милевски, Ивана Мирчевска, Бобан Момчиловски, Никола Нацевски Тамара Панова, Дејан Пејовски, Филип Симјаноски и Иван Спасески.