Во Деканатот на Медицинскиот факултет во Скопје денеска ќе биде промовирана монографијата „Македонски доајени кои биле избрани во доценти на Медицинскиот факултет во Скопје од 1955-60 г.“.
Монографијата е објавена по повод прославата и одбележувањето 75 години од формирањето на Медицинскиот факултет, 17 март 1947.
Публикацијата ја подготви проф. Дончо Донев кој повеќе од пет децении е учесник и сведок на активностите и развојот на Медицинскиот факултет каде што студирал, а подоцна станал и редовен професор.
-Оваа втора јубилејна монографија во издание на Медицинскиот факултет во Скопје, овојпат посебно ги чествува 24-те македонски великани на медицината кои биле избрани во доценти од 1955-60 г., и кои дале огромен придонес во иницијалниот развој и подем на Факултетот, во педесетите години на минатиот век, како и понатаму во развојот на медицината во земјава. Покрај петнаесеттемина наставници од Македонија, како помош од останатите краеви на тогашна Југославија пристигнале и 12 наставници од Србија, 11 од Хрватска, и уште неколкумина од други земји од Европа, вкупно околу 40, кои придонесле за основањето и иницијалниот развој на Медицинскиот факултет во Скопје во првите 10-ина години по неговото формирање. Од 1955-60 наставниот кадар се зајакнал со изборот на 24 доценти кои придонеле за брзиот подем на Факултетот во 1960-те и потоа, се наведува во најавата за промоцијата.