Ако некогаш браќата Кирил и Методиј ги поврзуваа и описменуваа Словените, вечерва една навидум таква мала мисија имаше доцент д-р Звонко Танески. 
Во Словачката амбасада во Република Македонија беа промовирани две книги за кои тој беше главниот „виновник“: научниот труд „Македонско-словачки компаративни согледби (студии и интерпретации)“, споредби на македонски и словачки автори, како и романот „Патагонија“ од словачкиот автор Душан Митана, чиј превод е исто така дело на Танески.
За научниот труд, издание на Институтот за македонска литература од Скопје, зборуваа проф. д-р Маја Јакимовска-Тошиќ и проф. д-р Соња Стојменска-Елзесер, а романот „Патагонија“ во издание на културната установа „Блесок“ го престави проф. д-р. Елизабета Шелева.
Промоцијата ја отвори амбасадорот на Р. Словачка во Македонија – д-р Роберт Кирнаг кој воодушевен од присуството на љубителите на убавиот збор, на одличен македонски јазик ја истакна потребата двете „мали“ земји, Македонија и Словачка, да ја зголемат својата меѓусебна соработка, каков што пример за тоа може да послужи и вечерашната промоција.