„Реформа на судството во Република Македонија:Промена без реформи?“ и „Уставниот суд изгубен во судските реформи“ од авторот Денис Прешова денеска ќе бидат промовирани во Скопје, во организација на Институтот за демократија „Социетас Цивилис“ – Скопје и Канцеларијата на Фондацијата Конрад Аденауер за Македонија.
Прешова, кој е соработник на Центарот за европски интеграции при ИДСЦС, во трудовите ги анализира тековните реформи во правосудниот сектор и нивната усогласеност со приоритетите на ЕУ.
Првиот труд „Реформа на судството во Република Македонија: Промена без реформи?“ ја анализира Стратегијата за реформа во правосудниот сектор за периодот 2017 – 2022 година, со акцент на реформите во Судскиот совет.
Додека, вториот труд насловен „Уставниот суд изгубен во судските реформи“ го обработува уставното судство во Македонија осврнувајќи се на потенцијалното позитивно влијание кое овој суд би можело да ја има врз судството, а низ призма на гореспоменатите судски реформи.
Стручен коментар на трудовите треба да даде поранешната судијка во Европскиот суд за човекови права во Стразбур, Мирјана Лазаровска-Трајковска.