Полициски службеници од СВР Скопје ја лишиле од слобода 45-годишната М.А. од Скопје. Таа се сомничи дека во претходниот период извршила кражби во три стана во Скопје, при што одзела накит со вкупна вредност од околу 960.000 денари, информира МВР.
– Таа била пријавена на 14.03.2022 од сопственичките на трите станови, каде повремено било ангажирана за чистење, дека ја искористила нивната доверба и во повеќе наврати одзела поголема количина златен накит. На 16.03.2022, врз основа на судска наредба, биле извршени претреси во домот на М.А. и во домот на нејзината мајка, при што бил пронајден дел од накитот, кој бил вратен на сопственичките, соопшти МВР.
М.А. била приведена во полициска станица и по целосно документирање на случајот против неа ќе биде поднесена соодветна пријава.