Основното јавно обвинителство за гонење на организиран криминал и корупција, постапувајќи по кривична пријава поднесена од Одделот за сузбивање на организиран и сериозен криминал – единица за недозволена трговија при МВР, донело наредба за спроведување на истражна постапка против Ф.И. (50) , С.Ф. (50) и М.А. (47), поради постоење на основано сомнение дека сториле кривично дело „неовластено производство и пуштање во промет наркотични дроги, психотропни супстанции и прекурсори“.
Од ЈОРМ соопштија дека вчера до судија на претходна постапка е поднесен и предлог за определување мерка притвор против трите лица.
– Во периодот од 20 до 23-ти овој месец С.Ф. од непознато лице купил наркотична дрога – марихуана, по што со Ф.И. се договорил тој да посредува на продажбата на дрогата. Ф.И. се договорил М.А. да ја купи наркотичната дрога и да ја размени за патничко моторно возило марка БМВ. На 22 март околу 19 часот Ф.И. во с. Одри од С.Ф. ја презел наркотичната дрога марихуана за да ја однесе на купувачот М.А., но околу 20 часот од страна на полициски службеници на МВР на РМ на локалниот пат од правец на с.Одри спрема с.Џепчиште е запрено патничко моторно возило марка Пежо 206 управувано од Ф.И. и по извршен преглед во возилото во делот кај патосницата од совозачкото седиште пронајдено е едно поголемо правоаголно пакување со проѕирна фолија во кое имало наркотична дрога марихуана со вкупна нето тежина од еден килограм, се наведува во соопштението од Јавното обвинителство.
Постапувајќи по предогот за определување притвор од судија на претходна постапка при Основен суд Скопје 1 Скопје е донесено решение за определување мерка притвор против тројцата обвинети, се додава во денешното соопштение од ЈОРМ.
