Пристигнати се 12 – те нови возила за Итната медицинска помош, извести министерот за здравство Венко Филипче. Во следните денови тие ќе бидат регистрирани и пуштени во употреба. Шест од новите возила ќе останат во Скопје, а останатите ќе бидат распоредени во другите градови низ државата каде што се најпотребни.
Електронската аукција за набавка на возилата беше спроведена во ноември 2018 година.
„ При набавката на амбулантните возила постигната е најниската цена на чинење, со што Министерството заштеди 12 милиони и 240 илјади денари или околу 200 илјади евра“, објави министерот Филипче на„Фејсбук“.
Минатиот месец министерот давајќи отчет за набавката на новите возила рече дека имале на располагање 30 милиони денари, а потрошиле 18 милиони поради пониската постигната цена. Бидејќи средствата се наменски, министерот Филипче најави дека со парите што остануваат може да се направи нова набавка.