Во Домот на културата „Марко Цепенков“ во Прилеп денеска ќе се одржи хуманитарна акција за обнова на манастирот Трескавец. Прилепските бербери и фризери од 10 до 17 часот ќе им ги нудат своите услуги на посетителите за 100 денари.
Во акцијата се вклучуваат 25 реномирани фризери и бербери од Прилеп преку регионалната занаетчиска комора, а тие очекуваат на повикот за учество да им се придружат и колеги од другите градови. Посетителите може да донираат и без да ги користат услугите на еснафот.
Собраните средства ќе бидат наменети за обнова на манастирот Трескавец. Ова е прва од ваков вид манифестација на овој еснаф кој се вклучува во мисијата за помош на манастирот чии конаци изгореа во пожарот на 4 февруари.
Соорганизатор на хуманитарната акција е прилепската локална самоуправа.