Само триесет проценти е исполнета Локалната стратегија за култура на општина Струмица, која се однесува за периодот од 2017 до 2022 година, соопшти денеска претседателката на Здружението за култура и развој на креативни индустрии „Транзен“, Јасмина Пијанманова.
Додаде дека за реализирање на локалната стратегија за култура потребно е, пред се, да се формира Одделение за култура во општина Струмица.
– Нашата општина е голема, а немаме такво одделение и покрај тоа што имаме солидни културни манифестации кои треба да ги менаџира токму тоа тело. Покрај тоа, бараме формирање Локален совет за култура. Тој треба да е составен од стручни лица од областа на културата и уметноста и треба да има советодавна улога, односно ќе дава совети на Советот и комисијата за култура и плус совети на градоначалникот, смета Пијанманова.
На денешната презентација на реализираниот проект на „Транзен“ беше истакното дека во Струмица има меѓу 100 и 150 лица кои работат во креативниот сектор, односно креативната индустрија. На овие креативци треба да им помогне општината и тоа преку најразлични форми на финансирање и логистичка поддршка.
