Пред граѓаните на општина Аеродром денеска ќе биде промовирана онлајн алатката „Локален избор“ (www.lokalenizbor.mk), којашто им овозможува на гласачите да ги споредат своите позиции со позициите на кандидат(к)ите и партиите кои ќе учествуваат на престојните локални избори.
Граѓаните имаат можност да одговорат на серија од 20 селектирани искази по важни прашања групирани во осум тематски области и тоа урбанизам и комунални работи, заштита на животната средина, безбедност, транспарентност и учество на граѓаните, децентрализација, економски развој, социјална грижа и еднакви можности.
Во фокусот на алатката се општините Аеродром, Чаир, Струга, Струмица и Росоман. Исказите се одбрани врз основа на претпоставката дека прашањата на кои кандидатите и партиите најчесто се осврнуваат во јавниот дискурс се оние поважните за гласачите. Кодирани се вкупно 18 кандидати и советнички листи во петте општини.
Сите кандитати и советнички листи биле контактирани за самостојно да ги кодираат сопствените позиции и да приложат доказен материјал (цитати и линкови) за нивните тврдења. Осум кандидати и советнички листи се одзвале на барањето.
Паралелно со самокодирањето, вршено е независно кодирање на позициите на политичките партии, преку внимателни анализи на партиските програми, медиумските изјави и интервјуа, како и изборните програми од претходни изборни циклуси таму каде тоа беа применливо.
„Локален избор“ е изработен од тим на истражувач(к)и од Институтот за истражување – Импакт. Проектот е финансиран од Амбасадата на Кралството Холандија во Република Македонија.