Претседателот на Стопанската комора за енергетика на Македонија, Ѓорѓи Манасков, тврди дека коронавирусот не е смртоносен и дека е обичен сезонски грип со мали модификации. Во ситуација кога во земјава се потврдени речси 2.000 случаи и над 100 смртни случаи од коронавирус. Манасков вели дека не верува дека вирусот е смртоносен за сите и дека три месеци граѓаните се во карантин без потреба.
„Измамници нечесни! Вирусот не е смртоносен. Тој е обичен сезонски грип, со мали модификации. Не верувам дека овој Ковид-19 е смртоносен за сите нас. Одма најдете ми еден од Ковид-19, доброволно се пријавувам да Ви докажам дека над нас се врши малтретирање. Три месеци не држите во карантин со полициски час, без потреба. Ни го уништивте животот, бизнисот и здравјето. Цел свет е пуштен и функционира, одат на плажа се сончаат и уживаат, работат и функционираат. Само во Македонија постои вонредна состојба и полициски час, што не се по меѓународни закони и прописи. Најубавиот дел од годината и нашиот живот го поминавме седејќи дома како да сме затвореници“, пишува Манасков на социјалните мрежи.
Тој побара од тие кои се плашат, да си ги земат, како што вели, парталите и да се лечат дома.
„Немој нас да не замарате и уште да не терате маски да носиме во ова жешко, казни ни пишување за неносење. Засрамете се. Ние не веруваме во вашите убедувања , ниту сакаме да веруваме. Ве молиме да не поштедите од овие измислици. Кој смета дека ќе се зарази да си седи дома. Нас граѓаните и компаниите, повеќе не нè интересираат вашите убедувања. Едноставно, Ви благодариме, не сме заинтересирани да ве слушаме и да ви веруваме. Немој повеќе да не замарате“, додава Манасков во објавата.
Инаку, бројот на хоспитализирани со Ковид-19 не се намалува. На Клиниката за инфективни болести и фебрилни состојби се хоспитализирани 58 пациенти од кои на кислородна поддршка се 24, а на механичка вентилација се двајца пациенти. Во ГОБ „8 Септември“ се хоспитализирани 18 пациенти од кои на респиратор се пет пациенти, a со потешка клиничка слика се уште четворица пациенти. Во болницата во Битола се хоспитализирани тројца пациенти, еден пациент во тешка состојба е пратен на Инфективната клиника во Скопје, а на домашно лекување се следат уште четворица пациенти. Во болницата во Штип се хоспитализирани пет пациенти и нема пациенти кои се следат на домашно лекување. На инфективните одделенија во Тетово, Велес, Куманово, Прилеп и Охрид се хоспитализирани 42 пациенти, позитивни и сомнителни на Ковид-19.