Претседателот на Владата на Република Македонија, Зоран Заев испрати честитка за изборот на новата Влада на Република Србија и стапувањето на должноста на Ана Брнабиќ за претседател на Владата на Србија.
– Поаѓајќи од нашите определби за натамошна изградба и унапредување на добрососедските односи, очекувам дека ќе продолжиме со плодната соработка меѓу владите на нашите две земји, како и меѓу надлежните институции, по прашања од заеднички интерес, како придонес во зајакнувањето на меѓусебните односи, се вели во честитката.
Сигурен сум, додава Заев, дека нашите заеднички напори дополнително ќе придонесат кон стабилноста, безбедноста и европската перспектива на нашиот регион.
– Во очекување на нашите идни средби и соработка, почитувана колешке Брнабиќ, примете ги изразите на моето највисоко почитување, се вели во честитката на премиерот Зоран Заев.
