Агенцијата за катастар на недвижности известува дека покрај другите надлежности надлежна е и за вршење по службена должност премер и одржување на државната граница на Република Македонија.
“Предмет на премерот на државната граница е означување и прибирање на просторни и описни податоци за граничните точки. При премерот на државната граница се изготвува ортофото план а за извршениот премер на државната граница се изготвува и геодетски елаборат во кој е содржана геодетско техничката документација.
Република Македонија е единствена од поранешните југословенски републики со решени државни граници со соседните држави.
За државната граница со Република Грција граничната документација е изработена во 1987 година, а за државната граница со Република Србија и Република Косово границата е обележена и за неа е изготвена најсовремена гранична документација заклучно со 2012 година.
Државната граница со Република Албанија и Република Бугарија е дефинирана но за неа не постои гранична документација.
Владата на Република Македонија и Владата на Република Бугарија , на 15.05.2000 година потпишаа Спогодба за чување, одржување, обновување и обележување на граничната линија и граничните белези на македонско – бугарската државна граница а истата е ратификувана во Собранието на РМ на 23.01.2002 година.
Врз основа на наведената спогодба формирана е Мешовита комисија за чување, одржување, обновување и обележување на македонско-бугарската државна граница.
Република Македонија со Република Бугарија има граница во вкупна должина од 185 км.
Согласно спогодбата границата е поделена во 2 сектори и тоа:
– Сектор бр.1 – од македонско-бугарска-грчката тромеѓа до граничната пирамида бр. 62
– Сектор бр. 2 – од граничната пирамида бр. 62 до македонско-бугарско-српската тромеѓа.
Согласно обврските кои произлегуваат од Спогодбата завршен е делот на границата од граничниот столб 50 до граничниот столб 72 во должина од 45 км и за истиот е изготвена комплета гранична документација.
Со програмата за снимање на границата на Министерството за надворешни работи и Агенцијата за катастар за 2016 година предвидено е снимање на границата од граничен столб 72 до граничен столб 106 ( тромеѓа меѓу Република Македонија, Република Србија и Република Бугарија) во должина од 70 километри.
Теренските работи ќе се одвиваат со почеток на 13 јули 2016 годинаи заедно со ортофото снимањето планирано е да завршат на 15 октомври 2016 година. Теренските работи ќе ги извршуваат стручни лица од Агенцијата за катастар на недвижности со најсовремена ГНСС (глобален навигациски сателитски систем) опрема и користење на МАКПОС (мрежа на перманентни ГНСС станици) системот.
За 2017 година планирано е да се заврши преостанатиот дел од македонско бугарската граница во должина од 70 км со што ќе се комплетира целокупната гранична документација помеѓу Македонија и Бугарија“ информираат од Агенцијата за катастар на недвижности.