Текстот на Предлог законот за амнестија кој го подготви интерпартиското тело за помирување е поставен на веб-сајтот на Собранието и поделен на пратениците. Законот е на дневен ред на собраниска седница од 16 и ќе се разглеува по скратена постапка.
Текстот го изготви и поднесе група пратеници која беше дел од собраниската подгрупа за помирување, предводена од пратеникот Зекир Рамчиловиќ.
„Основната цел на Предлог-законот е амнестија на лицата за кои постои основано сомневање дека сториле кривично дело поврзано со настаните во Собранието на Република Македонија од 27 април 2017 година, со цел помирување преку надминување на поделбите во општеството кои произлегуваат или се во врска со инцидентот во Собранието на Република Македонија од 27 април 2017 година“, стои во нацрт- законот.
Инаку, изготвувачите на законското решение, се оградија од тоа кој ќе биде опфатен со помилувањето, кажаа дека за тоа ќе одлучуваат обвинителството и судовите. Со законот ќе бидат казнети лица кои биле организатори на настаните од 27 и извршиле, носеле оружје или извршиле насилство.
„Овој исклучок не се однесува на сторители на кривичното дело „Насилство” од член 386 од Кривичниот законик , како и сторители на кривичното дело „Здружување заради непријателска дејност” од член 324 од Кривичниот законик во врска со членовите 18, 19, 23 и 24 од Кривичниот законик“, стои во текстот на предлог законот.
Се очекува законот да помине бидејќи за него се постигна консензус кој беше условен од осум пратеници, кои гласаа за уставните измени, а претходно се отцепија од ВМРО-ДПМНЕ и преминаа да делуваат како независни.
Не се знае дали законското решение ќе добие подршка од пратениците од опозициската ВМРО-ДПМНЕ, кои не дадоа зелено светло при изготвувањето на законот. Тие бараа со амнестијата да бидат опфатени сите, затоа што со ова решение според нив се прави селекција која се темели на политичко пазарење.
Габриела Димковиќ-Мишевска