Двајцата пратеници од ВМРО-ДПМНЕ, Координаторот на пратеничката група Никола Мицевски и пратеничката Ангелинка Петкова, си заминаа од Собранието.
Мицевски појасни дека ќе се врати, но морал да излезе поради тоа што „така налагале протоколите“.
Тој не прецизираше во колку часот ќе се врати, а на прашање дали ќе обезбедат 61 пратеник за гласање недоверба на Владата, рече дека претседателот на ВМРО-ДПМНЕ Мицкоски веќе дал изјава за тоа.
Двајцата пратеници денеска со скафандери дојдоа во Собранието, бидејќи се позитивни на Ковид-19, со цел да гласаат на седницата за доверба на Владата.
Тие требаше да гласаат во посебна просторија.
Собраниската седница за гласање недоверба на Владата не почна, откако пратеникот на Беса Кастриот Реџепи не дојде во Парламентот, па партиите што го иницираа гласањето не можеа да направат мнозинство од 61 пратеник.
По шпекулациите дека е можеби киднапиран, Реџепи во меѓувреме се јави преку видео порака на Фејсбук, велејќи дека е добар и дека чека да поминат заканите.